Dünya kuboku və Avropa çempionatı ərəfəsində çıxışlarını davam etdirən velosiped idmanının trek növü üzrə Azərbaycan yığma komandası İtaliyada birinci kateqoriyalı “Giorni delle Rose” kubokunda iştirak etmişdir.

Yığma komandamızın üzvü Olqa İsmayılova 200 metr məsafəyə sprint yarışlarında bütün rəqiblərini geridə qoyaraq turniri birinci pillədə başa vurmuş və reytinqinə 80 xal əlavə etmişdir. İdmançımız keyrində də uğurla çıxış edərək ikinci yeri tutmuş və reytinqini daha 72 xal artırmışdır.

Xatırladaq ki, O. İsmayılova ötən həftə Fransada keçirilən birinci kateqoriyalı “Fenioux Piste İnternational” və “Fenioux Trophy Piste” turnirlərində də uğurla çıxış edərək sprint yarışlarında 2 gümüş medal qazanmışdı.

Digər velosipedçimiz Yelena Pavluxina da “Fenioux Trophy Piste” kubokunda fəxri kürsüyə qalxmağı bacarmışdır. O, 10 min metr məsafəyə skretçdə mübarizə aparmış və yekunda 3-cü nəticə göstərmişdir.

Vaqif BAYRAMOV,

“Xalq qəzeti”