Bolqarıstanın Plovdiv şəhərində qadınlar arasında şahmat üzrə Avropa çempionatı tədricən finişə yaxınlaşır.

 On birinci dəfə keçirilən bu yarışın 116 iştirakçısı, o cümlədən Azərbaycan şahmat məktəbinin bir qrup yetirməsi qitə birinciliyinin medalları ilə yanaşı növbəti Dünya kuboku turnirində oynamaq hüququ verən 14 vəsiqə uğrunda mübarizə aparır.

On bir turdan ibarət çempionatın ilk səkkiz  raundunda təmsilçilərimiz arasında ən yaxşı nəticəni Günay Məmmədzadə və Gülnar Məmmədova göstərmişlər. Onlar hərəyə 5 xal toplamışlar. Əlavə göstəricilərə görə Günay 19-cu, Gülnar isə 28-ci yerləri tuturlar. Hər iki şahmatçımız turnir cədvəlinin üçüncü pilləsində irəliləyən ukraynalı Natalya Jukovadan bir xal geri qalır. Lider isə 7,5 xala malik Valentina Quninadır (Rusiya).

Avropa çempionatı medallarının və Dünya kuboku turnirinə vəsiqələrin sahibləri iyulun 17-də keçiriləcək 11-ci turun görüşlərindən sonra məlum olacaq.

Oqtay  BAYRAMOV, “Xalq qəzeti”