İyunun 14-də Veloparkda velosiped idmanının MTB (dağ velosipedi) növü üzrə ilk Azərbaycan çempionatı keçirilib. 15 iyun - Milli Qurtuluş Gününə həsr olunmuş yarışda peşəkar velosipedçilərlə yanaşı, həvəskar dağ velosipedçiləri də iştirak etmişlər.

Yarışın reqlamentinə əsasən, “Elit” və “U-23" yaş qrupunda çıxış edən idmançılar ümumi uzunluğu 2300 metr olan marşrut boyunca 8, yeniyetmə və gənclər 6, həvəskar dağ velosipedçiləri isə 4 dövrə vurmuşlar.

Ölkə çempionatının nəticələrinə gəlincə, həvəskarlar arasında Musa Mikayılzadə, Pərviz İlyasov və Ceyhun Əsədov ilk 3 yeri tutmuşlar. Yeniyetmə və gənclərin mübarizəsində 8 saylı İxtisaslaşdırılmış Olimpiya Ehtiyatları Uşaq-Gənclər İdman Məktəbinin təmsilçisi Kənan Qəhrəmanlı 1-ci olmuşdur. Onun komanda yoldaşı Nicat Qarayev 3-cü nəticə göstərmişdir. Gümüş medala isə respublika Olimpiya Ehtiyatları İxtisaslaşdırılmış Uşaq-Gənclər Velosiped İdmanı Məktəbinin velosipedçisi Tərlan Məmmədov layiq görülmüşdür.

Nəhayət, “Elit” və “U-23” yaş qrupunda Azərbaycan çempionu adına və xüsusi çempion köynəyinə ”Synergy Baku" komandasının üzvü Aqşin İsmayılov layiq görülmüşdür. Respublika Olimpiya Ehtiyatları İxtisaslaşdırılmış Uşaq-Gənclər Velosiped İdmanı Məktəbinin yetirməsi Orxan Məmmədov gümüş, onun komanda yoldaşı Murad Sultanov bürünc medal qazanmışlar.

Azərbaycan Velosiped İdmanı Federasiyasının vitse-prezidenti Sahib Ələkbərov dağ velosipedi üzrə ilk ölkə çempionatının əhəmiyyətini belə xarakterizə etmişdir: “Yarışın ölkəmiz üçün əlamətdar tarix olan Milli Qurtuluş Gününə həsr edilməsi rəmzi məna daşıyır. Çünki hazırda olduğumuz Velopark ötən əsrin 70-ci illərində məhz ümummilli liderimiz Heydər Əliyevin şəxsi təşəbbüsü və iştirakı ilə salınmışdır. Bu yarışın Azərbaycanda dağ velosipedinə olan marağı artıracağına inamımız böyükdür. Gələn il təşkil olunacaq ilk Avropa Oyunlarının proqramında velosiped idmanının şose, ”BMX" və dağ velosipedi növü üzrə yarışlar var. Əsas məqsədimiz idmançılarımızın uğurlu çıxışına nail olmaqdır".

İlk 3 yeri tutmuş velosipedçilər medal, diplom və qiymətli hədiyyələrlə təltif edilmişlər. Mükafatlandırma zamanı “Tour d’Azerbaidjan-2014" veloyürüşünün virtual oyun versiyasının qalibi Ayxan Məsimliyə də hədiyyə verilmişdir. O, Azərbaycan Velosiped İdmanı Federasiyası tərəfindən qiymətli velosipedlə təltif edilmişdir.

Qeyd edək ki, Azərbaycan çempionatının nəticələri Beynəlxalq Velosipedçilər İttifaqının (UCİ) reytinq siyahısında nəzərə alınacaqdır.

Vaqif BAYRAMOV, “Xalq qəzeti”