Azərbaycanın qadın güləşçiləri Almaniyanın Dormagen şəhərində  başa çatmış “Qran-Pri” turnirində böyük uğurun sevincini yaşamışlar. Bu mötəbər yarışda xalça üzərinə çıxmış hər üç təmsilçimiz kəsgin rəqabətdə medal qazanmağı bacarmışdır.

Güləşçilərimizdən ən böyük müvəffəqiyyətə Olimpiya oyunlarının ikiqat mükafatçısı Mariya Stadnik nail olmuşdur. Azərbaycan yığma komandasının lideri 48 kq çəki dərəcəsində Polşa, Kanada və Rusiya idmançıları ilə görüşlərdə öz üstünlüyünü inamla sübuta yetirmiş, finalda isə almaniyalı rəqibindən güclü olmuşdur. Bununla da Stadnik olimpiadalarda, dünya və Avropa çempionatlarında, “Qran-Pri”lərdə və digər beynəlxalq yarışlarda qazandığı yüksək mükafatlara daha bir qızıl medal əlavə etmişdir.

Qeyd edək ki, Ümumdünya Həvəskar Güləşçilər Assosiasiyasının saytı da Mariya Stadnikin Almaniya “Qran-Pri”sində inamlı qələbəsini yüksək qiymətləndirmişdir.

Dormagen turnirində mübarizə aparmış digər iki idmançımız İrina Netreba (58 kq) və Nadejda Sementsova (69 kq) isə “Qran-Pri”nin bürünc mükafatçıları olmuşlar.

Oqtay BAYRAMOV,

“Xalq qəzeti”