Azərbaycan paytaxtında bədii gimnastika üzrə 30-cu Avropa çempionatının təntənəli açılış mərasiminə getdikcə daha az vaxt qalır. İnşası bu yaxınlarda başa çatdırılmış və beynəlxalq idman dairələrində ən gözəl gimnastika saraylarından biri kimi qiymətləndirilən Milli Gimnastika Arenası artıq qarşıdakı yarışın iştirakçılarını qəbul etməyə hazırlaşır.

Tezliklə Avropa Gimnastika İttifaqının rəhbərləri, iştirakçı ölkələrin nümayəndə heyətləri, fəxri qonaqlar, xarici mətbuat nümayəndələri, zəriflik və gözəllik bayramını birbaşa hadisə yerində izləmək arzusunda olan bədii gimnastika pərəstişkarları Bakıya gəlməyə başalayacaqlar.  Iyunun 13-dən 15-dək keçiriləcək Avropa çempionatının medalları uğrunda 33 ölkənin təmsilçiləri mübarizə aparacaqlar. Xatırladaq ki, qarşıdakı qitə birinciliyi Azərbaycan paytaxtında üçüncü belə yarış olacaq. Avropanın ən yaxşı bədii gimnastika ustaları 2007 və 2009-cu illərdə də qalib və mükafatçıları Bakıda müəyyənləşdirmişdilər.

Bu günlərdə Minskdə keçirilmiş Dünya kuboku turniri şəhərimizdə Avropa çempionatı ərəfəsində Azərbaycan idmançıları üçün sonuncu mötəbər yarış olmuşdur. Belarus paytaxtında Azərbaycan komandasının lideri Maria Durunda iplə təmrinlərin yerinə yetirilməsində yaxşı hazırlıq nümayiş etdirmiş və bürünc medal qazanmışdır.

Indi isə Mariana və onun yığma kollektivimizdəki rəfiqələri Avropa çempionatında mükafatçı olmağa, fəxri kürsüyə yüksəlməyə çalışacaqlar.

Oqtay BAYRAMOV,
“Xalq qəzeti”