İrlandiyada Beynəlxalq Velosipedçilər İttifaqının (UCİ) 2.2 kateqoriyalı “An Post Ras” veloyürüşü Azərbaycanın “Synergy Baku” komandası üçün uğurla başa çatmışdır. Belə ki, təmsilçilərimiz 8 mərhələdən ibarət yarışda 2 mərhələnin qalibi olmuş və 1 köynəklə mükafatlandırılmışlar.

36 kollektivin iştirak etdiyi yarışın 134,3 kilometrlik  sonuncu mərhələsində “Synergy Baku”nun üzvü Daniel Klemme finişi liderdən 38 saniyə gec keçməklə 2-ci yeri tutmuşdur - 2 saat, 58 dəqiqə, 45 saniyə. Eyni nəticəyə imza atan Kristof Şvayzer isə 16-cı olmuşdur. Bu Şvayzerə yekun sıralanmada 5-ci pillədəki yerini qorumağa imkan vermişdir.

7-ci mərhələnin ən yaxşı dağ velosipedçisi olan Markus Eybeger isə 8-ci mərhələdə bu üstünlüyünü qoruya bilmiş və bununla da 97 xalla “An Post Ras” veloyürüşünün “Dağ Kralı” adına layiq görülmüşdür.

Xatırladaq ki, Eybeger bu yarışın 6-cı mərhələsində finiş xəttini 1-ci keçməklə mərhələ qalibi  sevincini də yaşamışdı. İrlandiya turunun 3-cü mərhələsində isə “Synergy Baku”nun digər üzvü Yan Sokol hamıdan güclü olmuşdu. Əldə edilən bu nailiyyətlər “Synergy Baku”nun yarışı komanda hesabında 5-ci pillədə bitirməsinə şərait yaratmışdır.

“Xalq qəzeti”