Azərbaycanın qadınlardan ibarət yığma voleybol komandası Sofiyada keçirilən Avropa çempionatının seçmə mərhələsində ilk qələbəsini qazanmışdır. Turnirin startında gözlənilmədən portuqaliyalı rəqiblərinə məğlub olan (2:3) voleybolçularımız ertəsi gün Yunanıstan kollektivinə qalib gəlmişlər - 3:1.

İki turdan sonra qrupun lideri Bolqarıstan komandasıdır. Yarış sahibləri Yunanıstan və Portuqaliya voleybolçularına eyni hesabla (3:0) qalib gəlmiş və 6 xal toplamışlar. Faiq Qarayevin yetirmələri 4 xalla ikinci yerdədirlər. Portuqaliyalılar 2 xal toplamışlar, yunanlar isə ilk iki turda xal qazana bilməmişlər.

Dünən axşam üçüncü turun oyunları keçirilmişdir. Azərbaycan kollektivi Bakı vaxtı ilə saat 20.00-da başlanan görüşdə Bolqarıstan komandası ilə qarşılaşmışdır. Bununla da iki dövrədən ibarət turnirin birinci yarısına yekun vurulmuşdur.

İkinci dövrənin oyunları mayın 29-31-də Bakıda keçiriləcəkdir. İki dövrənin ümumi yekununda yarışın qalibi Avropa çempionatının final mərhələsinə vəsiqə qazanacaqdır. İkinci yerin sahibi isə bu hüquq uğrunda pley-off görüşlərində mübarizə aparacaq.

Oqtay BAYRAMOV,
 “Xalq qəzeti”