Mayın 30-dan iyunun 1-dək Bakıda keçiriləcək yeniyetmələr arasında yüngül atletika üzrə Avropa zonasının ikinci təsnifat yarışı Azərbaycan paytaxtında növbəti mühüm idman hadisəsinə çevriləcək.

 Bu yarışın iştirakçıları üç gün ərzində Tofiq Bəhramov adına Respublika Stadionunda avqustun ikinci yarısında Çin Xalq Respublikasının Nanjinq şəhərində təşkil olunacaq Yeniyetmələrin II Yay Olimpiya  Oyunlarına lisenziya uğrunda gərgin mübarizə aparacaqlar.

     Təsnifat yarışında starta 40-dan çox ölkədən 800-dən artıq idmançı çıxacaq. Azərbaycan Yüngül Atletika Federasiyası saytının yaydığı xəbərə görə gənc atletlərin rəqabətində Olimpiadaya 190 lisenziya oynanılacaq. Onlardan 82-si oğlanlara, 108-i isə qızlara təqdim olunacaq. Qarşıdakı startlarda Azərbaycanı 15 idmançı təmsil edəcək.

    Yeniyetmələrin Olimpiya Oyunlarına  lisenziyaların sahibləri müxtəlif məsafələrə qaçış, idman yerişi, hündürlüyə və uzununa tullanma, üç təkanla tullanma, çəkic tullama və bəzi başqa növlərdə müəyyənləşəcək.

     Xatırladaq ki, Yeniyetmələrin I Yay Olimpiya Oyunları 2010-cu ildə Sinqapurda keçirilmişdir. Üçüncü Olimpiada  isə 2018-ci ildə Argentinanın paytaxtı Buenos-Ayresdə təşkil olunacaq.

Oqtay BAYRAMOV,

“Xalq qəzeti”