Azərbaycanın qadınlardan ibarət yığma voleybol komandası növbəti sınaq ərəfəsindədir. Millimiz bu günlər Avropa çempionatının seçmə yarışlarına son hazırlıq görür.

Qitə birinciliyinin final mərhələsinə vəsiqə uğrunda mübarizədə Faiq Qarayevin yetirmələrini Bolqarıstan, Yunanıstan və Portuqaliya kollektivləri ilə gərgin görüşlər gözləyir. Bu rəqiblər iki dövrədən ibarət yarışın birinci yarısında (22-24 may) Sofiyada qarşılaşacaq, sonra isə Bakıda rəqabəti davam etdirib (29-31 may) məqsədlərinə çatmağa çalışacaqlar.

Seçmə turnirində Azərbaycan komandasının şərəfini Natalya Məmmədova, Yelena və Oksana Parxomenkolar, Natəvan Qasımova, Polina Rəhimova, Kseniya Kovalenko və başqaları qoruyacaqlar. Bu təcrübəli voleybolçular və onların rəfiqələri istər Bolqarıstan paytaxtında, istərsə də “doğma divarlar” arasında rəqiblərinə öz üstünlüklərini sübuta yetirmək üçün qarşıdakı görüşlərə səylə hazırlaşırlar.

Komanda Avropa çempionatının seçmə mərhələsinə hazırlığın sonuncu mərhələsini Sloveniyada keçirir. Yığmamız burada təlim-məşq toplanışını başa vurduqdan sonra Sofiyaya yola düşəcək. Qızlara uğurlar arzulayaq.

Oqtay BAYRAMOV, “ Xalq qəzeti”