Üç gün ərzində “Sərhədçi” İdman Olimpiya Mərkəzində keçirilmiş cüdo üzrə “Böyük dəbilqə” turniri iştirakçıların tərkibinə görə çox mötəbər yarış olmuş və onun mükafatları uğrunda 44 ölkədən 300-ə yaxın tatami ustası mübarizə aparmışdır. Medallardan altısı Azərbaycan idmançılarına təqdim olunmuşdur.

Komandamızda ən böyük müvəffəqiyyəti 60 kq çəki dərəcəsində çıxış edən Orxan Səfərov qazanmışdır. O, bütün rəqiblərinə qalib gələrək fəxri kürsünün ən yüksək pilləsində təbrikləri qəbul etmişdir. Bu çəkidə gümüş mükafata isə Orxanın komanda yoldaşı Vüqar Şirinli sahib olmuşdur.

Elxan Məmmədov da (100 kq) çıxışlarını gümüş medalla başa vurmuşdur. Rüstəm Orucov (73 kq), Məmmədəli Mehdiyev (81 kq) və Kifayət Qasımova (57 kq) isə üçüncü yeri tutaraq bürünc medal qazanmışlar.

Nəticədə Azərbaycan yığması 1 qızıl, 2 gümüş və 3 bürünc mükafatla komanda hesabında dördüncü nəticə göstərmişdir. İlk üç yeri isə Fransa (3+2+2), Hollandiya ( 2+1+2) və Rusiya (1+2+5) komandaları tutmuşlar.

Oqtay BAYRAMOV, “Xalq qəzeti”