Rusiyanın Soçi şəhərində keçirilən XXII Qış Olimpiya Oyunlarında yolun yarısı artıq arxada qalmışdır. Olimpiadada ustalıqlarını nümayiş etdirmək növbəsi Azərbaycan idmançılarına da çatmışdır.

 Dörd təmsilçimizdən birinci olaraq starta fiqurlu konkisürənlər Yuliya Zlobina və Aleksey Sitnikov dueti çıxacaq. Onlar ilk proqramlarını bu gün göstərəcəklər.

Fevralın 18-də daha bir idmançımız Qaya Bassani dağ xizəkçiliyi məsafəsinə çıxacaq. Ertəsi gün isə Azərbaycan yığma komandasının digər dağ xizəkçisi Patrik Braxner mübarizəyə qoşulaşaq.

Olimpiadanın birinci həftəsində 132 medal-45 qızıl, 43 gümüş və 44 bürünc mükafat oynanılmışdır. Ümumkomanda hesabında Almaniya yığması irəli çıxmışdır – 7 qızıl, 2 gümüş, 1 bürünc mükafat. Sonrakı iki yeri İsveçrə (5+1+1) və Kanada (4+5+2) tuturlar.

Birinci onluğa həmçinin Norveç (4+3+6), ABŞ (4+3+6), Hollandiya (4+3+5), Belarus (3 qızıl, 1 bürünc medal), Rusiya (2+5+5), Çin (2 qızıl, 2 gümüş mükafat), Fransa (2 qızıl, 2 bürünc medal) daxildilər.

Cəmisi isə XXII Qış Olimpiya Oyunlarının birinci yarısında 26 ölkə nümayəndələri fəxri kürsüyə dəvət olunmuşlar. Keçmiş sovet respublikalarından Belarus və Rusiya ilə yanaşı, Latviya (2 bürünc medal, 24-cü yer,) hərəyə 1 bürünc mükafatla müvafiq surətdə 25-26-cı pillələrdə olan Ukrayna və Qazaxıstan da adlarını medal qazanmış ölkələrin siyahısına yazdırmışlar.

Dünən Olimpiadada daha yeddi dəst medal oynanılmışdır.

Oqtay BAYRAMOV,

 “Xalq qəzeti”