Yanvarın 23-də İran İslam Respublikasının paytaxtı Tehranda yunan-Roma güləşi üzrə 34-cü “Yadigar İmam Kuboku” Beynəlxalq turnirinin ilk gününə yekun vurulmuşdur. 

AzərTAc xəbər verir ki, “7 tir” Arenada  təşkil olunmuş yarışda yunan-Roma güləşi üzrə Azərbaycan yığma komandası da mübarizə aparmışdır.

Turnirin ilk günündə 59, 71, 80 və 98 kiloqram çəki dərəcələrində yarışan güləşçilər xalça üzərinə çıxmışlar.

Millimizin heyətində Elman Muxtarov (59 kq), Hacımurad Bağmanov (71 kq), Elvin Mürsəliyev (80 kq) və Araz Həsənov (98 kq) mübarizə aparmışlar.

Azərbaycan idmançılarından yalnız E.Muxtarov mükafatçılar sırasında yer almışdır. Güləşçimiz bürünc medala sahib olmuşdur.

Gərgin idman mübarizəsi şəraitində keçən yarışda Möhsan Hacıpur (59 kq, İran), həmçinin Macarıstan güləşçiləri Tomis Lorinç (71 kq), Peter Baçi (80 kq) və Balaş Kış (98 kq) fəxri kürsünün ən yüksək pilləsinə qalxmışlar.

Yanvarın 24-də yekun vurulacaq yarışda Azərbaycan ilə yanaşı, İran, İraq, Türkiyə, Koreya Xalq Demokratik Respublikası, Yaponiya, Gürcüstan, Macarıstan, İsveç və Ermənistandan olan pəhləvanlar mübarizə aparırlar.

Səxavət QULİYEV,

AzərTAc-ın müxbiri

Tehran