Futzal üzrə UEFA kuboku yarışlarının “Dördlər finalı” Bakıda təşkil olunacaq UEFA İcraiyyə Komitəsinin İspaniyanın Bilbao şəhərində keçirilmiş iclası məhz belə qərar çıxarmışdır.

“Dördlər finalı” gələn ilin aprelində keçiriləcəkdir. Xatırladaq ki, UEFA kuboku turnirinin həlledici mərhələsində fəxri mükafat uğrunda mübarizədə Azərbaycan çempionu “Araz”ın rəqibləri kubokun hazırkı sahibi Qazaxıstanın “Kayrat” komandası, İspaniyanın “Barselona” və Rusiyanın “Dinamo” (Moskva) klubları olacaq.

Qarşıdakı “Dördlər finalı” azərbaycanlı futzal həvəskarlarına çox maraqlı oyunlar vəd edir. “Araz” da öz növbəsində, şübhəsiz, onları sevindirmək, çətin sınaqlardan şərəflə çıxmaq və turnirin qalibi olmaq əzmindədir.

Oqtay BAYRAMOV,
“Xalq qəzeti”