Azərbaycanın “Azərreyl” klubu qadın komandaları arasında Avropa Voleybol Konfederasiyasının kuboku uğrunda yarışların 1/16 final mərhələsi sınaqlarından şərəflə çıxaraq səkkizdəbir finalda mübarizəni davam etdirmək hüququ qazanmışdır.

Bakılılar turnirin startında Serbiyanın paytaxtı Belqradda gərgin mübarizədən sonra yerli “Partizan” klubuna 2:3 hesabı ilə uduzmuşdular və evdə bu məğlubiyyətin əvəzini artıqlaması ilə çıxdılar. Voleybolçularımız cavab görüşündə onları tamamilə qane edən üstünlüklə qalib gəlib (3:1) səkkizdəbir finala çıxdılar.

Bu mərhələdə “Azərreyl”in rəqibi Çexiyanın “Olomuts” komandası olacaq. Səkkizdəbir final görüşləri dekabrın birinci yarısında keçiriləcəkdir. Azərbaycan voleybolçuları ilk oyunda rəqiblərini Bakıda qəbul edəcəklər.

Xatırladaq ki, daha bir klubumuz “Lokomotiv” də bu turnirdə səkkizdəbir finala çıxmış və qarşıda onu İsrailin “Hapoel” komandası ilə iki oyun gözləyir.

Oqtay BAYRAMOV,

 “Xalq qəzeti”