Bu gün “Bakı” - “Simurq” görüşü ilə Topaz Premyer Liqasında 12-ci tura start veriləcəkdir. Turun qalan oyunları noyabrın 2-də (“Neftçi”-"Xəzər-Lənkəran", “İnter”-"Rəvan") və 3-də (“Sumqayıt” - AZAL, “Qarabağ” - “Qəbələ”) keçiriləcəkdir.

Şübhəsiz, azarkeşlər qarşıdakı görüşlərdən ikisini daha böyük maraqla gözləyirlər. Vahid lider “Qarabağ”la (24 xal) turnir cədvəlinin üçüncü pilləsində irəliləyən “Qəbələ”nin (22), eləcə də ikinci yerdə olan və Qəbələ klubu ilə eyni miqdarda xal toplayan “Neftçi”nin bu yaxınlarda Naxçıvanda Azərbaycan Superkuboku görüşündə məğlub olduğu Lənkəran komandası ilə rəqabəti prinsipial əhəmiyyət daşıyır. Deməli, bu qənaətə gələ bilərik ki, milli çempionatımızın liderlər üçlüyünün iştirakı ilə keçiriləcək görüşlərdə azarkeşlər darıxmalı olmayacaq, əksinə, hər iki oyunda əvvəldən axıradək maraqlı və gərgin mübarizənin şahidi olacaqlar.

Oqtay BAYRAMOV,
“Xalq qəzeti”