“SOCAR  Azərbaycan” – bu dəfə bürünc medal

Şəhriyar Məmmədyarov-beşinci taxtada birinci yer

Ötən il İsrailin Eylat şəhərində keçirilmiş şahmat üzrə klublararası Avropa çempionatının qalibi “SOCAR Azərbaycan” ötən şənbə günü Yunanıstanın Rodos adasında başa çatmış növbəti qitə birinciliyində bürünc medalla kifayətlənmişdir. Əvəzində Şəhriyar Məmmədyarov keçirdiyi beş görüşdə 4 xal toplayaraq (3 qələbə və 2 heç-heçə) dördüncü taxtada 80 faizli nəticə ilə birinci yeri tutmuş və qızıl medala sahib olmuşdur.

İlk beş matçda beş qələbə qazanan “SOCAR” (Şəhriyar Məmmədyarov, Teymur Rəcəbov, Eltac Səfərli, habelə italiyalı Fabiano Karuana, bolqar Veselin Topalov, ABŞ-dan Qata Kamski, çinli Van Hao və hollandiyalı Aniş Giri, komandanın kapitanı Vladimir Tukmakovdur) altıncı turda gözlənilmədən Çexiyanın “Novi Bor” komandasına 2, 5: 3,5 hesabı ilə uduzmuş, finişdə isə Sankt-Peterburq Şahmat Federasiyasının komandası ilə   heç-heçə oynamışdır -3:3.

Nəticədə ötən ilki Avropa çempionu bu dəfə 11 xalla üçüncü yeri tutmuşdur. Qızıl və gümüş medalları müvafiq surətdə “Novi Bor” (13 xal) və Rusiyanın “Malaxit” (12 xal) klubları qazanmışlar.

Belə mötəbər yarışda ilk dəfə çıxış edən digər təmsilçimiz “ Odlar Yurdu” isə 53 komanda arasında 14-cü nəticə göstərmişdir. Onun Avropa çempionatında təmsil olunduğu heyət bütünlüklə Azərbaycan şahmat məktəbinin yetirmələrindən ibarət idi: Emil Sutovski-hazırda İsraildə yaşayan keçmiş bakılı, komandamızın oynayan məşqçisi, Qədir Hüseynov, Vasif Durarbəyli,  Rauf Məmmədov, Nicat Məmmədov, Vüqar Rəsulov, Nicat Abbasov, Zaur Məmmədov. Əgər bu konmanndannın qitə birinciliyində ilk dəfə mübarizə apardığını nəzərə alsaq, debüt üçün 14-cü yer pis nəticə deyil.

Oqtay BAYRAMOV,
  “Xalq qəzeti”