Sentyabrın 6-da Bakıdakı “Elite Horse and Polo Club”da polo üzrə dünya kuboku yarışlarının təntənəli açılış mərasimi keçirilmişdir. AzərTAc xəbər verir ki, əvvəlcə Azərbaycanın turizm potensialından bəhs edən videoçarx nümayiş olunmuşdur.

Azərbaycan Respublikası Atçılıq Federasiyasının (ARAF)  prezidenti Elçin Quliyev idmançılarımızın qazandıqları nailiyyətdən danışmış və respublikamızda idmana göstərilən dövlət qayğısını yüksək qiymətləndirmişdir. Polo üzrə beynəlxalq yarışın ölkəmizdə ilk dəfə təşkil olunduğunu diqqətə çatdıran E.Quliyev son dörd ildə ARAF-nin həyata keçirdiyi layihələr barədə məlumat vermişdir. Bildirmişdir ki, polo Azərbaycanın tarixi və məşhur idman növlərindən olan çövkənin müasir və dəyişdirilmiş formasıdır. Artıq ölkəmizdə polo üzrə milli komandanın formalaşdırılmasına başlanılmışdır. Cari ilin sonunda ARAF Beynəlxalq Polo Federasiyasına üzv qəbul ediləcəkdir.

Yarışın iştirakçılarına uğurlar arzulayan ARAF-nin prezidenti yarışı açıq elan etmişdir. Azərbaycanın dövlət himni səsləndirildikdən sonra çövkən oyununun tarixi barədə məlumat verilmişdir. Sonra milli geyimli qız və oğlanlar at belində “Cəngi” sədaları altında meydana daxil olmuşlar. Milli geyimli oğlanlar at belində nümunəvi çıxış təqdim etmişlər. “Polo Vətəninə qayıdır” şüarı altında keçirilən yarışda 8 komanda iştirak edir. Bunlardan dördü - “Çopard” (Argentina), “Bentli” (Böyük Britaniya), “Monblan” (ABŞ) və “Baltika” (Avropa) peşəkar komandalardır. Yarışda yalnız yerli oyunçularından təşkil olunmuş “Qarabağ”, “Göyəzən”, eləcə də “Milla Qrin” və “Milla Vayt” kollektivləri də birincilik uğrunda mübarizə aparırlar.