Rotterdamda (Hollandiya) gənclər arasında boks üzrə Avropa çempionatına yekun vurulmuşdur. Final döyüşlərindən üçü Azərbaycan idmançılarının iştirakı ilə keçirilmişdir. Onlardan ikisi həlledici görüşdə də rinqi qalib kimi tərk edərək fəxri kürsünün zirvəsinə yüksəlmişdir.

Nəsrəddin Məmmədov (56 kq) və Cavid Quliyev (64 kq) finalda müvafiq surətdə irlandiyalı Kurt Uokeri və Ukrayna təmsilçisi Yaroslav Samofalovu məğlubiyytə uğradaraq qitə birinciliyinin qızıl medallarına sevinmişlər. Məsud Yusifzadə isə 52 kq çəki dərəcəsində gümüş mükafatçı olmuşdur. Boksçumuz finalda irlandiyalı Reddi Kulliyə uduzmuşdur.

Nəticədə gənc dəri əlcək ustalarımız Avropa çempionatında Azərbaycana iki qızıl və bir gümüş medal qazandırmışlar.