Bu günlər bir çox ölkənin gənc güləşçiləri Sofiyanın qonağıdırlar. Burada keçirilən dünya çempionatı “klassiklərin” yarışı ilə başlanmışdır. Turnirin birinci günü mübarizəyə qoşulan Azərbaycanın dörd güləşçisindən ikisi fəxri kürsüdə təbrikləri qəbul etmişdir.

Dünya çempionatında ilk fərqlənən idmançılarımız Elman Muxtarov və Ceyhun Əliyev olmuşlar. Onlar müvafiq surətdə 60 və 74 kq çəki dərəcələrində üçüncü yeri tutaraq ölkəmizə iki bürünc medal qazandırmışlar.

Dünən yunan-Roma üsulu ilə güləşənlərin yarışı davam etdirilmişdir. Bu gün isə qızlar xalça üzərinə dəvət olunacaqlar. Bolqarıstan paytaxtında dünya çempionatı avqustun 18-də sərbəst üsulla güləşənlərin görüşləri ilə başa çatacaq.