Azərbaycanlı qrossmeyster Şəhriyar Məmmədyarovun Norveçin Tromse şəhərində keçirilən şahmat üzrə Dünya kuboku turnirində ikinci mərhələyə vəsiqə qazanması barədə qəzetimizin dünənki sayında məlumat vermişik. Bu gün isə əlavə edək ki, Teymur Rəcəbov və Eltac Səfərli də 1/32 finalda oynamaq hüququnu özlərinə təmin etmişlər.

Bu şahmatçılarımız yarışın start mərhələsində müvafiq surətdə Peru təmsilçisi Xorxe Kori və misirli Amin Bassem ilə qarşılaşmışlar. Hər iki matç gərgin mübarizə şəraitində davam etmiş və klassik görüşlərdə rəqiblərdən heç biri üstünlük qazana bilməmişdir - 1:1. Sürətli şahmatda isə həmvətənlərimiz daha dəqiq oynamışlar. Rəcəbov da, Səfərli də matçları 3,5:2,5 hesabı ilə öz xeyirlərinə başa çatdırmışlar.

Turnirdəki daha bir təmsilçimiz Vasif Durarbəyli isə ukraynalı Anton Korobova uduzaraq (1:3) Dünya kuboku yarışında çıxışlarını dayandırmışdır.

Birinci mərhələdən sonra 128 iştirakçıdan yarısı turnirlə vidalaşmışdır. İndi Dünya kubokuna 64 iddiaçı qalır. İkinci raundun (14-16 avqust) görüşlərinə dünən axşam start verilmişdir. Bu mərhələdə Məmmədyarovun rəqibi, xəbər verdiyimiz kimi, Maksim Matlakovdur (Rusiya), Rəcəbov kubalı Lazaro Bruzonla, Səfərli isə ABŞ şahmatçısı Hikaru Nakamura ilə qarşılaşırlar.

Oqtay BAYRAMOV,

“Xalq qəzeti”