Rusiyanın Kazan şəhərində keçirilən Ümümdünya Yay Universiadasının dördüncü günü azərbaycanlı tələbələrə daha bir medal təqdim olunmuşdur. Özü də ən yüksək mükafat-qızıl medal! Ölkəmizə bu böyük müvəffəqiyyətin sevincini ağırlıqqaldıran Firudin Quliyev yaşatmışdır.

Bütün yarış ərzində möhkəm iradə və əsl qələbə əzmi nümayiş etdirən Firudin birdən 142 kq ağırlıq qaldırmış, təkanla isə 181 kq nəticə göstərərək iki hərəkətin cəmində 323 kq göstərici ilə bütün rəqiblərini geridə qoymuşdur. O, 69 kq çəki dərəcəsində Universiadanın çempionu və rekordçusu kimi təbrikləri qəbul etmişdir.

Ağırlıqqaldıranımızın qızıl medalı yarışların dörd günündən sonra Azərbaycan yığma komandasını Ümumdünya Universiadasının mükafatlarını qazanmış 43 ölkənin siyahısında birdən-birə doqquz pillə irəli aparmışdır. Əgər bundan bir gün əvvəl Ülviyyə Kərimovanın kəmər güləşində və Kristina İovunun ağır atletikada gümüş, Məmmədəli Mehdiyevin cüdoda bürünc medalları sayəsində ölkəmiz 25-ci yerdə idisə, Quliyevin çempıonluğundan sonra Azərbaycan 16-cı mövqeyə yüksəlmişdir.  

 Universiada startlarında 170 ölkə nümayəndələri çıxış edirlər. Yarışların ilk dörd günündə Rusiya idmançıları daha çox-39 qızıl, 16 gümüş və 22 bürünc medal qazanmışlar. İkinci-beşinci yerlərdə Cənubi Koreya (6+3+2), Yaponiya (5+8+8), Ukrayna (4+12+10) və Çin (4+7+4) qərar tutmuşlar.    Universiadanın proqramına şahmat da daxildir. Oğlanların turnirində 86 nəfər, o cümlədən 24 qrossmeyster, qızların yarışında isə 71 iştirakçı (20-si qrossmeysterdir) mübarizə aparır. Hər ölkə səkkiz şahmatçı-dörd oğlan və dörd qızla təmsil olunnur. İsveçrə sistemi üzrə keçirilib doqquz turdan ibarət olan turnirlərdə Azərbaycan şahmatçıları Vasif Durarbəyli, Nicat Abbasov, Zaur Məmmədov, Bəhruz Rzayev, Nərmin Kazımova, Türkan Məmmədyarova və Nərmin Xələfova startda qənləbə qazanmışlar, təkcə Nərgiz Umudova uduzmuşdur. Qeyd edək ki, şahmat yarışlarında komandaların tutduqları yerlər onların daha yaxşı nəticə göstərən üç oyunçusunun çıxışlarına əsasən müəyyənləşdiriləcəkdir.

Tatarıstan paytaxtında Ümumdünya Universiadası getdikcə sürətini artırır. Qarşıda hələ daha bir həftə ərzində keçiriləcək müxtəlif növlər üzrə yarışlar durur. On iki növdə 76 nəfərlə təmsil olunan (onlardan 30-u çıxışlarını başa vurmuşdur) Azərbaycan idmançılarının növbəti medallar qazanıb mükafatçı ölkələrin siyahısında respublikamızın mövqelərini möhkələndirmək, hətta bir qədər də irəliləmək imnkanları vardır.

Oqtay BAYRAMOV,

 “Xalq qəzeti”