Qrossmeyster Nicat Məmmədov Çex Respublikasının Teplitse şəhərində keçirilmiş beynəlxalq turnirdə bütün rəqiblərindən yaxşı çıxış etmişdir. Şahmatçımız 150-dən çox iştirakçının mübarizə apardığı yarışda 9 mümkün xaldan 7 xal toplayaraq baş mükafata sahib olmuşdur.

Turnirdə ikinci-üçüncü yerləri tutan çexiyalılar Vlastimil Babula, Jan Kresji və daha bir neçə rəqib də Məmmədovla eyni nəticə göstərmişlər, lakin onların hamısı əlavə göstəricilərə görə Nicatdan geri qalmışdır.

Yeniyetmə şahmatçılarımız isə Gürcüstanın Ureki şəhərində keçirilmiş aşağı yaş qrupları arasında Avropa kuboku yarışlarında fərqlənərək Azərbaycana 1 qızıl, 3 gümüş və 2 bürünc medalla qayıtmışlar.

Qızıl medala 12 yaşadək iştirakçıların turnirində doqquz görüşdə 8 xal toplayan Vüqar Əsədli sevinmişdir. Fərid Mustafayev 10 yaşadək oğlanların, Zeynəb İsmayılzadə isə həmin yaş qrupunda qızların yarışında gümüş mükafat qazanmışlar. Aydın Süleymanlı da (8 yaşadək) finişə ikinci nəticə ilə çatmışdır. Vüqar Manafov  (10 yaşadək) və Kənan Qarayev (12 yaşadək) bürünc medallara sahib olmuşlar.

Oqtay BAYRAMOV, “Xalq qəzeti”