Azərbaycan şahmatçısı Şəhriyar Məmmədyarov ötən bazar günü Moskvada finişə çatmış Mixail Talın xatirəsinə həsr edilən ənənəvi beynəlxalq turnirdə kifayət qədər uğurla çıxış edərək 9 mümkün xaldan 5 xal toplamışdır. Fabiano Karuana (İtaliya) və Dmitri Andreykin də (Rusiya) onunla eyni nəticə göstərmişlər. Əlavə göstəricilərə görə Karuana üçüncü, Şəhriyar dördüncü olmuşlar.

Turnirdə bir dəfə də uduzmayan qrossmeysterimiz ilk görüşdə ABŞ təmsilçisi Hikaru Nakamura üzərində qələbə qazandıqdan sonra qalan səkkiz oyunda rəqibləri ilə heç-heçəyə razılaşmışdır. Nəticədə Məmmədyarov yekun cədvəlində bir çox rəqibini, o cümlədən Rusiya yığma komandasının liderlərindən biri olan Sergey Karyakini (4 xal), hazırkı dünya çempionu hindistanlı Vişvanatan Anandı (3,5), keçmiş dünya çempionu rusiyalı Vladimir Kramniki (3) geridə qoymuş və on məşhur rəqibin mübarizəsində çıxışlarını yaxşı əhval-ruhiyyə ilə başa vurmuşdur.

Təşkilatçıların 100 min avro məbləğində mükafat fondu təsis etdikləri superturnirin qalibi adını isə 6 xalla 45 yaşlı Boris Gelfand (İsrail) qazanmışdır. İkinci yeri qarşıdakı payızda dünya şahmat tacı uğrunda matçda Anandın rəqibi olacaq Maqnus Karlsen (Norveç) tutmuşdur - 5,5 xal.

Moskva turnirinin yekunlarına dair bu qeydlərə onu da əlavə edək ki, tezliklə Məmmədyarov daha bir məsul yarışda mübarizə aparacaq. O, iyulun 3-dən 17-dək Pekində keçiriləcək FİDE-nin “Qran-Pri” yarışları seriyasından növbəti, beşinci mərhələ turnirində iştirak edəcəkdir.

Oqtay BAYRAMOV, “Xalq qəzeti”