Topaz Premyer Liqasında mövsümün əvvəlindən azarkeşləri maraqlandıran bütün suallara hələ sonuncudan əvvəlki, 31-ci turda cavab alınmışdı.

Finişə bir tur qalmış “Neftçi” qızıl medalları və Çempionlar Liqasında oynamaq hüququnu özünə təmin etməsi, “Qarabağ” və “İnter” müvafiq surətdə gümüş və bürünc mükafatçılar olub Avroliqa turnirinə vəsiqə qazanmaları münasibətilə ilkin təbrikləri qəbul etmişdilər. Milli çempionatımızda, gözlənildiyinin əksinə olaraq, uğursuz çıxış etməsinə baxmayaraq, Azərbaycan kuboku yarışlarının finalınadək irəliləyən və mayın 28-də “Neftçi” ilə həlledici final görüşündə necə oynayacağından asılı olmayaraq “Xəzər-Lənkəran”ın da ölkəmizi Avropa Liqası turnirində təmsil edəcəyi məlum idi.

Bu səbəbdən də birinci altılıq komandalarının son turda oyunları elə bir əhəmiyyət kəsb etmirdi. Bu görüşlərdə “Neftçi”nin “Bakı”ya  uduzması (0:1) çempionun hədsiz sevincinə xələl gətirmədi, “Qarabağ” futbolçuları “Simurq” ilə matçdan yəqin ki, hər iki rəqibi qane edən qolsuz heç-heçə ilə ayrildılar, “İnter” isə “Qəbələ” üzərində qələbə qazansa da  (1:0) Ağdam klubunu ikinci pillədən sıxışdırmaq imkanını hələ son tur ərəfəsində itirmişdi. Nəticədə “Neftçi” finişə 62, “Qarabağ” 59, “İnter” isə 57 xalla çatdılar.

Sonuncu Avroliqa turnirində də kifayət qədər uğurla çıxış edib Azərbaycan klubları arasında birinci olaraq, qitəmiqyaslı yarışların qrup mərhələsinə vəsiqənin sevincini yaşamış, İtaliyanın “İnter” (Milan), Rusiyanın “Rubin” (Kazan) və Serbiyanın “Partizan” (Belqrad) kimi komandalarını Bakıya gətirmiş Böyükağa Hacıyevin yetirmələri indi futbol ictimaiyyətimizin ümidlərini Çempionlar Liqaslnda doğrultmağa çalışacaqlar.

Milli çempionatlarımızda ardıcıl üçüncü il ən yüksək zirvəni fəth etməsi ilə haqlı olaraq fəxr edə biləcək “Neftçi”yə qitə klub futbolunun ən nüfuzlu yarışını “Qarabağ”, “İnter” və “Xəzər-Lənkəran”a isə Avroliqa görüşlərini tam hazırlıqla qarşılayıb, mümkün qədər çox qələbə sevinci keçirməyi arzulayaq.

Oqtay BAYRAMOV,
“Xalq qəzeti”