Azərbaycan xalqının ümummilli lideri Heydər Əliyevin anadan olmasının 90-cı ildönümünə həsr edilmiş “Naxçıvan Open-2013” beynəlxalq şahmat turniri yenicə finiş xəttinə çatmışdır. İndi isə muxtar respublika paytaxtında güləşçilər starta hazırlaşırlar. Yunan-Roma güləşi üzrə gənclər arasında “Naxçıvan kuboku” turniri də ulu öndərin xatirəsinə həsr olunmuşdur.

Bu yarışda Azərbaycan və Naxçıvan komandaları altı ölkədən olan qonaqları ilə rəqabət aparacaqlar. “Klassiklərimizin” rəqibləri Rusiya, Türkiyə, İran, Gürcüstan, Özbəkistan və Ukrayna təmsilçiləri olacaqlar.

Mayın 4-5-də keçiriləcək “Naxçıvan kuboku” turnirinin iştirakçıları ilkin mərhələdə iki qrupda yarışacaqlar. Qrupların qalibləri öz aralarında keçirəcəkləri final görüşündə kubokun sahibini müəyyənləşdirəcəklər. Qruplarda ikinci yeri tutan komandaların matçında isə bürünc medalların taleyi həll olunacaq.

Naxçıvan Olimpiya Kompleksində keçiriləcək ənənəvi beynəlxalq turnirin açılış mərasimi mayın 4-nə təyin edilmişdir. Guman etmək olar ki, şahmatçıların görüşləri kimi, güləşçilərin turniri  də naxçıvanlı idman həvəskarlarının böyük marağına səbəb olacaq. Axı, onlar beynəlxalq xalça üzərində xatirə turnirinin medalları uğrunda gərgin mübarizənin şahidi olmaq, gənc yunan-Roma güləşçilərinin ustalığını qiymətləndirmək  imkanı qazanacaqlar.

Oqtay BAYRAMOV,

“Xalq qəzeti”