Albaniyanın paytaxtı Tiranada keçirilən kişi və qadınlar arasında ağırlıqqaldırma üzrə Avropa çempionatının ilk iki günü Azərbaycan idmançılarının böyük uğurları ilə əlamətdar olmuşdur. Həmin günlərdə mübarizəyə qoşulan hər üç idmançımız fəxri kürsüdə təbrikləri qəbul etmişdir.

Çempionatda ölkəmizin medallarının hesabını qadınların yarışında Silviya Angelova açmışdır. O, iki hərəkətin cəmində 179 kq nəticə göstərərək 48 kq-dək çəki dərəcəsində qitə birinciliyinin gümüş mükafatçısı olmuşdur.  Bundan əlavə, təmsilçimiz birdən ağırlıqqaldırmada 80 kq nəticə ilə kiçik bürünc medal, təkanla ağırlıqqaldırmada isə (99 kq) kiçik qızıl medal qazanmışdır. İki hərəkətin cəmində Silviyanın göstəricisinin Avropa çempionu italiyalı Cenni Palyaronun nəticəsindən cəmi 2 kq geri qaldığını da qeyd edək.

Ertəsi gün kişilərin yarışında Valentin Xristov və Zülfüqar Süleymanov fərqlənmişlər. Onların hər ikisi 62 kq-dək çəki dərəcəsində çıxış etmişdir. London Olimpiadasının bürünc mükafatçısı Xristov birdən 137, təkanla 175 kq ağırlıq qaldıraraq iki hərəkətin cəmində 312 kq nəticə ilə Avropa çempionu adını qazanmışdır. Valentin ayrı-ayrı hərəkətlərdə də iki kiçik qızıl medala sahib olmuşdur.

Həmin axşam Süleymanov da ona bəslənilən ümidləri doğrultmuşdur. Zülfüqar birdən  ağırlıqqaldırmada 130 kq nəticə ilə dördüncü olmuş, təkanla 160 kq ağırlıq qaldıraraq bu hərəkətdə kiçik bürünc medal qazanmış, iki hərəkətin cəmində isə (290 kq) çıxışlarını fəxri kürsünün üçüncü pilləsində başa vurmuşdur.

Beləliklə, Avropa çempionatının ilk iki günündə Azərbaycan ağırlıqqaldıranları idman ictimaiyyətimizə böyük sevinc hissi yaşatmışlar. Dünən axşam daha bir təmsilçimiz 69 kq çəki dərəcəsində çıxış edən Sərdar Həsənov yarış meydanına dəvət olunmuşdur.

Oqtay BAYRAMOV,

“Xalq qəzeti”