Ölkəmizin tatami ustaları Yunanıstanın Saloniki şəhərində keçirilmiş “İliadis kuboku” turnirində yaxşı hazırlıq nümayiş etdirmiş və yeddi dəfə fəxri kürsüyə dəvət olunmuşlar.

Komandamızda ən böyük müvəffəqiyyəti 55 kq çəki dərəcəsində çıxış edən Mehman Sadıqov qazanmışdır. Təmsilçimiz bütün rəqiblərini məğlubiyyətə uğradaraq turnirin qızıl mükafatçısı olmuşdur.

Yalnız final görüşündə uduzan Cəlil Cəlilov (66 kq) çıxışlarını gümüş medalla başa vurmuşdur. Telman Vəliyev (60 kq), Afiq Səfərli (73 kq), Məmmədəli Mehdiyev (81 kq),  Firudin Dadaşov (90 kq) və Andrey Fətiyev isə (100 kq-dan yuxarı) üçüncü yeri tutmuşlar.

Nəticədə, Azərbaycan yığması 1 qızıl, 1 gümüş və 5 bürünc medalla 20 ölkə komandaları arasında altıncı olmuşdur.

Oqtay BAYRAMOV,
“Xalq qəzeti”