Topaz Premyer Liqasında turlar bir-birini əvəz etdikcə, deməli, həm də finiş yaxınlaşdıqca qızıl medallar uğrunda mübarizə daha kəskin şəkil alır. Əgər ötən şənbə gününədək “Neftçi”nin turnir cədvəlinin zirvəsində mövqeyi kifayət qədər möhkəm görünürdüsə, həmin gün “Qarabağ”ın vahid lider üzərində qələbəsi, “İnter”in isə “Bakı” ilə görüşdə müvəffəqiyyəti (hər iki oyunda eyni hesab qeydə alınmışdır-2:1) cədvəlin ən yüksək pillələrində vəziyyəti mürəkkəbləşdirmişdir.

Ağdam klubu ilə görüşdə məğlubiyyətə baxmyaraq, 48 xalla liderliyini davam etdirən “Neftçi” hazırda cədvəldə ən yaxın izləyicisi olan “İnter”dən cəmi bir xal irəlidədir. Xal ehtiyatını 45-ə çatdıran “Qarabağ” da çempionluq mübarizəsində öz imkanlarını xeyli yaxşılaşdırmışdır.

Ötən turda çempionatın ən güclü altı komandası sırasında mübarizə aparan klubların daha bir görüşündə rəqiblər hərəyə bir xalla kifayətlənmişlər. Qəbələdə eyniadlı yerli klubla “Simurq” bir-birinin müqavimətini qıra bilməmişlər-1:1.

İknci altılıq komandalarının oyunları isə belə nəticələnmişdir: “Kəpəz”-“Xəzər-Lənkəran”-1:2, “Rəvan”-“Sumqayıt”-3:0, AZAL-“Turan”-2:0.

Növbəti, 26-cı tur aprelin 12-14-də keçiriləcəkdir. Bu turda “Simurq”-“Neftçi” və “Qarabağ”-“İnter” görüşləri daha böyük maraqla gözlənilir.

Oqtay BAYRAMOV,
“Xalq qəzeti”