Vergilər Nazirliyinin inzibati binasında vergi xidməti əməkdaşları arasında ümummilli lider Heydər Əliyevin 90 illik yubileyinə həsr olunmuş ənənəvi şahmat turnirinin açılış mərasimi keçirilmişdir. Turnir Vergilər Nazirliyi tərəfindən Gənclər və İdman Nazirliyi və Azərbaycan Şahmat Federasiyasının dəstəyi ilə təşkil edilmişdir.

Turnirin iştirakçılarını salamlayan vergilər nazirinin müavini, 3-cü dərəcəli dövlət vergi xidməti müşaviri Sahib Ələkbərov bildirmişdir ki, Azərbaycanda şahmatın zəngin inkişaf yolu var və şahmat ölkəmiz üçün ənənəvi idman növlərindəndir. Respublikamızda böyük şahmatçılar yetişmişdir. Şahmatın daha da sürətlə inkişaf etməsi, şahmatçılarımızın müstəqil dövlətin təmsilçisi kimi beynəlxalq səviyyədə uğurlarının artması isə ümummilli lider Heydər Əliyevin hakimiyyətə gəlməsi ilə başlanmışdır. Məhz dahi rəhbərin Azərbaycana rəhbərlik etdiyi dövrdə şahmatın inkişafına göstərilən diqqət və qayğı nəticəsində ölkənin bir çox şəhər və rayonlarında onlarla şahmat məktəbləri və klublar açılmış, şahmata maraq kütləvi xarakter almış və şahmat məktəbi formalaşmağa başlamışdır.

S.Ələkbərov Prezident İlham Əliyevin şahmatın inkişafına böyük diqqət yetirdiyini, dövlət başçımızın 2009-cu ildə bu məqsədlə respublikamızda şahmatın inkişaf etdirilməsi haqqında xüsusi sərəncam imzaladığını vurğulamışdır. Qeyd etmişdir ki, şahmatçılara göstərilən dövlət qayğısının nəticəsində onların beynəlxalq yarışlarda qazandıqları nailiyyətlərin sayı gündən-günə artır. Azərbaycanlı şahmatçılar müxtəlif beynəlxalq yarışlarda uğurlu nəticələr əldə edirlər.

Vergi orqanlarının bütün struktur bölmələrinin nümayəndələrinin iştirak etdiyi, Olimpiya sistemi üzrə keçirilən turnir aprel ayının 27-də başa çatacaqdır.

Vaqif BAYRAMOV,

“Xalq qəzeti”