Bu gün Krasnodar diyarının Loo qəsəbəsində kişi və qadın komandaları arasında şahmat üzrə Rusiya çempionatına start veriləcəkdir. Kişilərin yarışında qələbə uğrunda 18, qadınların turnirində 6 komanda mübarizə aparacaqdır.

Kişilər 6, qadınlar 4 taxtada yarışacaqlar.

Çempionat iştirakçıları arasında Azərbaycanın dörd şahmatçısı da vardır. Şəhriyar Məmmədyarov Sverdlovsk vilayətinin  “Malaxit Şahmat Klubu”nun şərəfini qoruyacaq, Rauf Məmmədov Krasnodar diyarının “Universitet Beloreçensk” komandasının uğur qazanmasına çalışacaq, Eltac Səfərli “Naviqator” (Moskva) komandası heyətində çıxış edəcək, Gülnar Məmmədova Sankt- Peterburqun “M.İ.Ciqorin adına klub”una kömək edəcək.

Kişi komandalarının çempionatı İsveçrə sistemi üzrə keçirilib yeddi turdan ibarət olacaq, qadınlar isə dairəvi sistem üzrə mübarizə aparıb çempionu beş turda müəyyənləşdirəcəklər.

Oqtay BAYRAMOV,

“Xalq qəzeti”