Ölkəmizin futzal üzrə yığma komandası Slovakiyada yenicə başa çatmış Avropa çempionatının əsas seçmə mərhələsində uğurla çıxış edərək final turnirinə vəsiqə qazanmışdır. Özü də futzal ustalarımız bu müvəffəqiyyətə maksimum nəticə ilə nail olmuşlar.

Azərbaycan komandasının ilk iki oyunda norveçli rəqiblərinə 6:0, Bosniya və Herseqovinaya isə 3:2 hesabı ilə qalib gəlməsi haqqında məlumat vermişdik. Turnirin sonuncu günü futzalçılarımız meydan sahibi rolunda çıxış edən Slovakiya yığmasını da məğlubiyyətə uğratmışlar-2:1. Nəticədə 9 mümkün xaldan 9 xal toplayan Azərbaycan komandası 2-ci qrupda birinci yeri tutmuş və 2014-cü ilin yanvar ayında Belçikada keçiriləcək Avropa çempionatının final turnirində oynamaq hüququ qazanmışdır.

Yığmamızla yanaşı İtaliya, Rusiya, İspaniya, Portuqaliya, Çexiya və Sloveniya komandaları da qitə birinciliyinin həlledici mərhələsinə vəsiqələri özlərinə təmin etmişlər. Final turnirinin daha dörd iştirakçısı isə sentyabrda keçiriləcək pley-off görüşlərindən sonra məlum olacaq.

Oqtay BAYRAMOV,
“Xalq qəzeti”