Sumqayıt Olimpiya İdman Kompleksində 2000-2002-ci il təvəllüdlü oğlanlar arasında şəhərlərarası turnir keçirilib. Yarışda beş yerli komanda ilə bərabər, Bakının yeddi klubunu, həmçinin Gəncə, Siyəzən, Quba, Ağdam, Bərdə, Qusar və Yevlax şəhərlərini təmsil edən 300-ə yaxın cüdoçu qalib adı uğrunda mübarizə aparıb.

Yarışın təntənəli açılış mərasimində Sumqayıt Şəhər Gənclər və İdman Baş İdarəsinin rəisi Musa Həsənov və Olimpiya İdman Kompleksinin direktoru Hüseyn Abbasov iştirakçıları salamlayaraq onlara uğurlar arzulayıblar. Bədii hissədə rəqs nömrələri nümayiş etdirildikdən sonra yarışlara start verilib.

Turnirdə Teyyub Abdullayev, Səxavət Hacıyev, Murad Abışov, Nazir Talıbov, Ruslan Paşayev, Vüsal İbrahimov, Azər Qələndərli, Cavad İbrahimov, Aqil Mikayıl, Elvin Quluzadə və Məhəmməd Əfəndiyev fəxri kürsünün ən yüksək pilləsinə qalxıblar.

Sumqayıtdakı 1 saylı Uşaq Gənclər İdman Məktəbində veteranlar arasında stolüstü tennis üzrə açıq şəhər çempionatı keçirilib. Yarışda yerli idmançılarla yanaşı, Bakı, Salyan və Quba şəhərlərinin 20 veteran tennisçisi iştirak edib. Gərgin idman mübarizəsindən sonra Niyaz Əzimov, Qulu Quliyev və Azər Cəfərov müvafiq olaraq 1-ci, 2-ci və 3-cü yerləri tutublar.

Sumqayıt Şəhər İcra Hakimiyyəti tərəfindən “Dövlət Bayrağı” meydanında təşkil olunan bayram tədbirlərində isə milli güləşçilərin nümunəvi çıxışları və kəndirdartma yarışları seyrçilərin marağına səbəb olub. Bayram iştirakçıları idmançıların müxtəlif güləş fəndlərinə və qurşaq tutmalarına tamaşa ediblər. Kəndirdartma yarışında səkkiz komanda iştirak edib. “Azərikimya” və Paralimpiya Kompleksinin komandaları finalda qarşılaşıblar. Kimyaçı idmançılar daha güclü olduqlarını sübuta yetiriblər.

Əli NƏCƏFXANLI,

 “Xalq qəzeti”