Londonda Mühəndislik və Texnologiya İnstitutunda (İET) şahmat üzrə iddiaçıların turniri başlamışdır. Bu münasibətlə keçirilən tədbirdə gənclər və idman naziri Azad Rəhimovun başçılıq etdiyi nümayəndə heyəti, Azərbaycanın Böyük Britaniyadakı səfiri Fəxrəddin Qurbanov və səfirliyin əməkdaşları, Britaniyadan və müxtəlif ölkələrdən hökumət və ictimaiyyət nümayəndələri, KİV-lərin təmsilçiləri iştirak etmişlər.

Mərasimdə çıxış edən Beynəlxalq Şahmat Federasiyasının prezidenti Kirşan İlümjinov və “AGON” şirkətinin rəhbəri Andrev Paulsen turnirin əhəmiyyətini vurğulamışlar. Azərbaycanda idmana göstərilən dövlət qayğısından danışan çıxışçılar ölkəmizdə şahmatın inkişafı istiqamətində görülən işləri yüksək qiymətləndirmişlər. Bildirilmişdir ki, Azərbaycan yeganə ölkədir ki, Prezident tərəfindən şahmatın inkişaf etdirilməsi istiqamətində Dövlət Proqramı imzalanmışdır. Çıxış edənlər, eyni zamanda, Azərbaycan Respublikası Dövlət Neft Şirkətinə göstərdiyi dəstəyə görə minnətdarlıqlarını bildirmişlər.

Açılış mərasimindən sonra qəbul təşkil edilmişdir.

Yarışda Azərbaycanı qrossmeyster Teymur Rəcəbov  təmsil edəcəkdir. Turnirin digər iştirakçıları isə Rusiyadan Vladimir Kramnik, Aleksandr Qrişuk, Petr Svidler, Norveçdən Maqnus Karlsen, Ukraynadan Vasili İvançuk, İsraildən Boris Gelfand və başqaları olacaqlar. Onlar bir-biri ilə 2 dəfə - həm ağ, həm də qara fiqurlarla üz-üzə gələcəklər.

 Turnirin ümumi mükafat fondu 510 min avrodur.

Martın 15-də startı verilən turnir 14 turdan ibarətdir. Sonuncu tur aprelin 1-də keçiriləcəkdir.

Birinci turda keçirilən bütün görüşlər hec-hecə nəticələnmişdir.

Orxan İSMAYILOV

AzərTAc-ın xüsusi müxbiri

London