Bu gün İngiltərə paytaxtında ilin ən mötəbər şahmat yarışı-iddiaçıların dünya birinciliyi uğrunda turnirinin açılış mərasimi olacaq. Azərbaycanın qədim oyun pərəstişkarlarının da böyük maraq və xoş bir həyəcanla gözlədikləri bu turnirin qalibi hazırkı dünya çempionu hindistanlı Vişvanatan Anand ilə şahmat tacı uğrunda matçda qarşılaşmaq hüququ qazanacaq.

Rəqiblərin hamısı bir-birinə layiqdir və şübhəsiz, onların hər biri yalnız və yalnız qələbə əzmindədir. Başqa cür ola da bilməz, turnirin bütün səkkiz iştirakçısı müdrik oyunun mahir ustasıdır və Londona böyük ümidlərlə gəlmişdir. Təkcə onu demək kifayətdir ki, iddiaçıların yarısı FİDE-nin reytinq cədvəlində ilk dörd pillədə qərar tutmuş qrossmeysterlərdir. Onlardan biri həmin siyahıda dördüncü mövqedə olan Azərbaycan şahmatının lideri Teymur Rəcəbovdur (2793).

Cədvəlin ilk üç pilləsində hələ çox gənc olmasına baxmayaraq, ardıcıl uğurları ilə şahmat aləmini heyrətləndirməkdə olan norveçli Maqnus Karlsen (2872), keçmiş dünya çempionu Vladimir Kramnik (Rusiya, 2810) və Levon Aronyan (Ermənistan, 2809) yer almışlar.

“Böyük  dördlüyün” qalan dörd rəqibinin isə reytinq cədvəlində mövqeləri belədir: 10. Aleksandr Qrişuk (Rusiya, 2764), 13. Vasili İvançuk (Ukrayna, 2757), 14. Pyotr  Svidler (Rusiya, 2747), 18. Boris Gelfand (İsrail, 2740).

Turnirin ən gənc iştirakçısı bu il noyabrın 30-da 23 yaşı tamam olacaq Karlsendir. İki gün əvvəl, martın 12-də 26 yaşını qeyd etmiş Rəcəbov ondan üç yaş böyükdür. Yarışın ən yaşlı iştirakçısı isə 45 yaşlı Gelfanddır. Burada xatırlatmaq yerinə düşər ki, iddiaçıların  iki il əvvəl Kazanda (Rusiya) keçirilmiş yarışının qalibi məhz israilli qrossmeyster olmuş və o, tac uğrunda həlledici matçda 2007-ci ildən bəri dünya çempionu adını özündə saxlayan Ananda yalnız gərgin mübarizədən sonra uduzmuşdur.

Təşkilatçıların 510 min avro məbləğində mükafat fondu təsis etdiləri indiki turnir iki dövrədən ibarətdir və rəqiblər aprelin 1-dək hərəyə 14 görüş keçirəcəklər. Yarış ərzində qrossmeysterlərə dörd istirahət günü nəzərdə tutulmuşdur (martın 18, 22, 26 və 30-da).

Beləliklə, iddiaçıların dünya birinciliyi uğrunda turniri start ərəfəsindədir. Artıq sabah ilk görüşlər oynanılacaq, kimi sevinəcək, kimi də məyus olacaq. Xəbər verdiyimiz kimi, Rəcəbov birinci turda qara fiqurlarla Gelfanda qarşı oynayacaq, ertəsi gün isə ağlarla İvançuka rəqib olacaq.

London-2012 hələ xatirələrdə təzədir. Ötən il Azərbaycan idmançıları bu şəhəri tarixi nailiyətlə və təbii ki, əla əhval-ruhiyyə ilə tərk etdilər. Həmvətənlərimiz XXX Yay Olimpiya Oyunlarından 10 medal-2 qızıl, 2 gümüş və 6 bürünc mükafatla qayıdaraq, 205 ölkə arasında 30-cu yeri tutmaqla xalqımıza hədsiz sevinc hissi yaşatdılar. Onlardan sonra isə Azərbaycan paralimpiyaçıları 12 dəfə fəxri kürsüyə yüksəlib (4 qızıl, 5 gümüş, 3 bürünc medal və ümumi hesabda 27-ci yer) ölkəmizin idman tarixinə növbəti parlaq səhifə yazdılar.

Göründüyü kimi, İngiltərə paytaxtı Azərbaycan idmançıları üçün çox uğurlu şəhərdir. Olimpiyaçı və paralimpiyaçılarımız bu yarışların tarixində özlərinin ən böyük qələbələrinə məhz burada nail olmuşlar. London-2013-də iddiaçıların turnirində həmin uğurların davamını görmək Azərbaycana necə də böyük sevinc gətirər!..

Oqtay BAYRAMOV,
“Xalq qəzeti”