Azərbaycan çempionu Bakının qadınlardan ibarət “Rabitə” komandası öz tarixində ikinci dəfə Çempionlar Liqası turnirinin finalında oynamış və qitə klub voleybolunun bu ən nüfuzlu yarışının ikiqat gümüş mükafatçısı olmuşdur.

Əlbəttə, gümüşdən də qiymətli medal vardır. Lakin qızıl medal qazanmağa, Liqanın kubokunu Azərbaycana gətirməyə “Rabitə”nin gücü çatmadı. Hərçənd turnirin lap əvvəlindən işlər çox yaxşı gedirdi. Voleybolçularımız qrup mərhələsində, sonra da pleyy-off görüşlərində bütün rəqiblərini məğlubiyyətə uğradaraq İstanbulun “Burxan Fələk” idman sarayında keçirilən “Dördlər finalı”na vəsiqə qazanmaqda elə bir çətinlik çəkməmişdilər.

“Rabitə” həlledici mərhələyə də inamla başlayıb yarımfinalda pərəstişkarlarını İtaliyanın “Yamamay” komandası üzərində qələbə ilə sevindirdi-3:2. İstanbul klublarının qarşılaşdığı digər yarımfinaldan finala “Qalatasaray”a 3:0 hesabı ilə qalib gələn “Vakifbank” çıxdı.

Həlledici görüşdə isə tarix təkrar olundu. İki il əvvəl elə həmin idman sarayında “Rabitə”ni finalda məğlubiyyətə uğradan “Vakifbank” bu dəfə də Azərbaycan klubundan üstün oyun nümayiş etdirib (3:0) yenidən Çempionlar Liqası kubokunu bayram etdi. Turnirin bürünc medallarını üçüncü yer uğrunda görüşdə “Qalatasaray”a qalib gələn “Yamamay” voleybolçuları qazandılar.

Yarışın bağlanış mərasimində təşkilatçıların ən yaxşı oyunçular üçün təsis etdikləri mükafatlardan ikisi “Rabitə” voleybolçularına təqdim olundu. Nataşa Krsmanoviç blokda ən yaxşı oyunçu hesab edildi, Madaneyn Montano isə ən sərrast hücumçu mükafatına sahib oldu.

Oqtay BAYRAMOV,
“Xalq qəzeti”