Bu yaxınlarda Fransanın Kann şəhərində beynəlxalq turnirin bürünc medalını qazanmış Azərbaycan şahmatçısı Eltac Səfərli indi də Makedoniyada “Karpos Open” turnirinin mükafatları uğrunda mübarizə aparır.

Qrossmeysterimiz yarışa inamla başlayaraq ilk üç turda üç qələbə qazanmışdır. Startda makedoniyalı Vlatko Petkovskini məğlubiyyətə uğradan Səfərli növbəti iki görüşdə Serbiya təmsilçiləri Miroslav Tosiç və Aleksandr İnciçi də məğlubiyyətlə razılaşmağa məcbur etmişdir.

Üç turdan sonra 3 xala malik Eltac liderlər qrupunda irəliləyir. Onun kimi daha yeddi iştirakçı maksimum miqdarda xal toplamışdır. Dünən axşam keçirilən dördüncü turda həmyerlimiz xorvatiyalı A.Yankoviç ilə görüşmüşdür.

Oqtay BAYRAMOV,
“Xalq qəzeti”