İddiaçıların turnirində Rəcəbovun ilk rəqibi Gelfand olacaq

Londonda iddiaçıların şahmat üzrə dünya birinciliyi uğrunda turnirinin açılış mərasiminə bir həftə qalır. Artıq yarışın təqvimi də məlumdur. Turnirin saytında göstərildiyi kimi, azərbaycanlı qrossmeyster Teymur Rəcəbov ilk görüşü martın 15-də qara fiqurlarla israilli Boris Gelfanda qarşı keçirəcək.

Ertəsi gün təmsilçimiz ağlarla Vasili İvançuka (Ukrayna) qalib gəlməyə çalışacaq. Xatırladaq ki, təşkilatçıların 510 min avro məbləğində mükafat fondu təsis etdikləri turnir iki dövrədən ibarətdir. Birinci dövrədə Azərbaycan şahmatçısı qalan görüşləri bu ardıcıllıqla keçirəcəkdir: 17 mart. Pyotr Svidler (Rusiya).  19 mart. Vladimir Kramnik (Rusiya). 20 mart. Aleksandr Qrişuk (Rusiya). 21 mart. Levon Aronyan (Ermənistan). 23 mart. Maqnus  Karslen (Norveç).

İkinci dövrəyə martın 24-də start veriləcək. Sonuncu turun görüşləri isə aprelin 1-də keçiriləcək.

Dörddəbir final: cavab görüşləri

Bu gün futbol üzrə Azərbaycan kuboku yarışlarında dörddəbir final mərhələsinin cavab görüşləri keçiriləcək və yarımfinalda fəxri mükafat uğrunda mübarizəni davam etdirəcək rəqiblər məlum olacaq.

Dörddəbir finalın ilk oyunlarından sonra “Xəzər-Lənkəran” yarımfinal vəsiqəsinə daha yaxındır. Lənkəran klubunun bir həftə əvvəl Bakıda “Rəvan” üzərində qələbəsi (2:1) doğma şəhərdə cavab görüşündən sonra iki oyunun ümumi yekununda onun növbəti mərhələyə çıxmasına yaxşı zəmin yaratmışdır.

Digər üç cütdə isə oyunlar daha gərgin mübarizə vəd edir. Dörddəbir finalın startında “Qəbələ” - “Qarabağ” (1:1), “Bakı”-“İnter” (1:1) və “Simurq”- “Neftçi” (0:0) görüşlərində heç-heçə qeydə alınmışdır. İndi meydan sahibi rolunda Ağdam klubu, “İnter” və “Neftçi” çıxış edəcəklər. “Doğma divarlar”ın onlara nə dərəcədə kömək edəcəyini, yarımfinalda kuboka hansı dörd iddiaçını görəcəyimizi bu axşam biləcəyik.

Oqtay BAYRAMOV,
“Xalq qəzeti”