Topaz Premyer Liqasında təsnifat mərhələsinin sonuncu, 22-ci turunun görüşləri keçirilmiş (“Bakı”-“Rəvan”-2:1, AZAL-“Qəbələ”-6:1, “Xəzər-Lənkəran”- “Sumqayıt”-2:2, “Qarabağ”- “İnter”-0:0, “Turan”- “Neftçi” -2:3, “Kəpəz”- “Simurq” -1:1) və bu mərhələdə azarkeşləri maraqlandıran bütün suallara cavab alınmışdır.

Ölkənin ən yaxşı altı komandası sırasında medallar uğrunda mübarizəni davam etdirmək hüququnu vaxtından əvvəl özlərinə təmin edən “Neftçi” (44 xal), “İnter” (41), “Qarabağ” (39), “Simurq” (36) və “Qəbələ” yə (32) son anda “Bakı” da (30) qoşulmuşdur.

Maraqlı və gərgin mübarizə vəd edən final mərhələsinin ilk oyunları martın 12-13-də keçiriləcəkdir. Çempionatın 23-cü turunda birinci altılıqda “Simurq”la “Qarabağ”, “Qəbələ” ilə “İnter” və “Bakı” ilə “Neftçi” qarşılaşacaqlar. Yeddi-on ikinci yerlər uğrunda mübarizədə isə  “Sumqayıt” -"Turan", “Rəvan”-"Xəzər-Lənkəran" və “Kəpəz”- AZAL görüşləri keçiriləcəkdir.

Oqtay BAYRAMOV,
“Xalq qəzeti”