“Cəsurlar” respublika hərbi-idman və turizm oyunu üzrə Sumqayıt şəhər birinciliyinə  və zona yarışlarına yekun vurulmuşdur. M.Hüseynzadə adına şəhər stadionunda keçirilən birinciliyin həlledici mərhələsində 12 məktəb, gimnaziya və liseyi təmsil edən komandalar iştirak etmişdir.

Gənclər və İdman Baş İdarəsinin rəisi Musa Həsənov 15 ildən bəri müntəzəm keçirilən “Cəsurlar” və “Şahin” hərbi-idman oyunlarının böyüməkdə olan nəslin vətənpərvərlik tərbiyəsində mühüm yer tutduğunu vurğulamışdır. Təhsil Şöbəsinin müdiri Mahal Əliyev  hərbi-idman oyunlarının yeniyetmə və gənclərin hərbi xidmətə qədər mənəvi və fiziki hazırlığında əhəmiyətli rolundan danışaraq iştirakçılara uğurlar arzulamışdır.

Komandalar “Cəsurlar” hərbi-idman və turizm oyununun Əsasnaməsinə uyğun olaraq sıra hazırlığı, taxta hasarın, körpünün və xəndəyin üstündən keçməklə maneələri dəf etmə, “zəhərli zona”dan keçmə, turist çadırının qurulması mərhələləri üzrə yarışmışlar.

Yarışların yekunlarına əsasən Milli Qəhrəman Mətləb Quliyev adına 3 saylı tam orta məktəbin komandası 1-ci yeri tutaraq “Cəsurlar” hərbi-idman və turizm oyununun zona birinciliyinə vəsiqə qazanmışdır.

Xaçmazda təşkil olunan zona yarışlarında sumqayıtlılar Abşeron, Siyəzən, Xızı, Şabran, Xaçmaz, Qusar, Quba və Qubadlı idmançıları ilə mübarizə aparmışlar. Gənclik şəhərinin komandası ən yüksək nəticə ilə zona mərhələsinin qalibi olmuşdur. Şabranlı “Cəsurlar” 2-ci, Qusar təmsilçiləri isə 3-cü yeri tutmuşlar. Qalib komanda Gənclər və İdman Nazirliyinin diplomu ilə təltif edilmiş və respublika finalında iştirak etmək hüququ qazanmışdır.

 Əli NƏCƏFXANLI,
“Xalq qəzeti”