Beynəlxalq Şahmat Federasiyası (FİDE) martın 1-nə olan vəziyyətə görə reytinq cədvəlini dərc etdirmişdir. İki azərbaycanlı qrossmeyster siyahıda əvvəlkitək birinci onluqda irəliləyir.

Martın 15-dən aprelin 1-dək Londonda keçiriləcək iddiaçıların turnirinə hazırlaşan Teymur Rəcəbov (2793) dördüncü mövqedədir, Azərbaycan yığmasında onun komanda yoldaşı Şəhriyar Məmmədyarov (2766) isə doqquzuncudur.

Norveçli Maqnus Karlsenin (2872) başçılıq etdiyi siyahıda dünyanın ən yüksək reytinqli on şahmatçısı sırasına həmçinin Vladimir Kramnik (Rusiya, 2810), Levon Aronyan (Ermənistan, 2809), Sergey Karyakin (Rusiya, 2786), Vişvanatan Anand (Hindistan, 2784), Veselin Topalov (Bolqarıstan, 2771), Hikaru Nakamura (ABŞ, 2767) və Aleksandr Qrişuk (Rusiya, 2764) daxildirlər.

Planetin ən yaxşı yüz şahmatçısının siyahısında Vüqar Həşimov (2737) 19-cu, Rauf Məmmədov (2662) 83-cü yerləri tuturlar.

FİDE dünyanın ən yaxşı yüz qadın şahmatçısının da siyahısını açıqlamışdır. Bu siyahıda bir təmsilçimiz yer almışdır. Gülnar Məmmədova 2360 xalla 97-ci pillədədir.

Oqtay BAYRAMOV,
“Xalq qəzeti”