Ötən bazar günü “Turan”ın Sumqayıtda eyniadlı yerli klub üzərində qələbəsi ilə başa çatan (1:0) Topaz Premyer Liqasında ilkin mərhələnin 21-ci turundan sonra final turnirində medallar uğrunda mübarizə aparacaq daha bir komanda məlum olmuşdur.

Bu oyundan bir gün əvvəl “Qəbələ” futbolçuları “Xəzər-Lənkəran” ilə görüşdə müvəffəqiyyət sayəsində (2:0) həlledici mərhələyə vəsiqəni özlərinə təmin etmişlər.

Bəs “Neftçi” (41 xal), “İnter” (40), “Qarabağ” (38), “Simurq” (35) və “Qəbələ” (32) ilə yanaşı daha hansı komanda final mərhələsində oynamaq hüququ qazanacaq?

Bu suala martın 3-nə təyin edilmiş 22-ci tur cavab verəcək. Birinci altılığa aparan yolda sonuncu vəsiqəyə üç komanda bu-gün hərəyə 27 xalla müvafiq surətdə altıncı-yeddinci mövqelərdə olan “Bakı”, “Xəzər-Lənkəran” və səkkizinci pillədə qərarlaşıb onlardan bir xal geri qalan AZAL namizəddirlər. Qarşıdakı turda bu üç komandanın iştirakı ilə keçiriləcək “Bakı” - “Rəvan”, “Xəzər-Lənkəran” - “Sumqayıt” və AZAL - “Qəbələ” görüşləri təbii ki, xüsusi maraqla gözlənilir. Turun qalan üç oyununda isə “Qarabağ”la “İnter”, “Kəpəz”lə  “Simurq” və “Turan”la “Neftçi” üz-üzə gələcəklər.

Oqtay BAYRAMOV,
“Xalq qəzeti”