Bu gün iki oyunla Topaz Premyer Liqasında ilkin mərhələnin sonuncudan əvvəlki, 21-ci turuna start veriləcəkdir. Bu görüşlərdə “Rəvan” futbolçuları “Qarabağ”ı qəbul edəcəklər, “Simurq” isə “Bakı” ilə qarşılaşacaq.

Sabah azarkeşlər üç oyunun şahidi olacaqlar: “Qəbələ” - “Xəzər-Lənkəran”, “Neftçi” - “İnter”, AZAL - “Kəpəz”. Tura fevralın 24-də “Sumqayıt” və “Turan” komandalarının görüşü ilə yekun vurulacaq.

Əgər bu oyunlar ərəfəsində çempionatın final mərhələsində medallar uğrunda mübarizə aparacaq altı klubdan dördü artıq məlumdursa, hazırda vahid lider “İnter” (40 xal) və turnir cədvəlində onun ən yaxın üç izləyicisi “Neftçi” (38), “Qarabağ” (35) və “Simurq”a (34) daha hansı iki komandanın rəqib olacağı finişdə müəyyənləşəcək.

Hazırda beşinci-altıncı pillələrdə müvafiq surətdə 29 və 27 xala malik “Qəbələ” və “Xəzər-Lənkəran” klubları irəliləyirlər. Yeddinci mövqedə olan “Bakı” isə Lənkəran komandasından cəmi bir xal geri qalır.

Bir sözlə, finişin iki addımlığında bu üç kollektivi prinsipial oyunlar gözləyir. Maraqlıdır, onların rəqabətində kim sevinəcək, birinci altılıqda bugünkü dörd liderlə yanaşı daha hansı iki komandanı görəcəyik. Tezliklə bu məsələ də qəti surətdə öz həllini tapacaq.

Oqtay BAYRAMOV,
“Xalq qəzeti”