Ümumdünya Xüsusi Qış Olimpiya Oyunlarında döşəmə üzərində xokkey yığmamızın nəticələrinin yekunları ilə bağlı tədbir keçirildi. İclası giriş sözü ilə açan Xüsusi Olimpiya Komitəsinin Prezidenti Şahin Əliyev Koreya Respublikasının Pyeonq Chanq şəhərində keçirilmiş Ümumdünya Xüsusi Qış Olimpiya Oyunlarında döşəmə üzərində xokkey yığmamızın nəticələri barədə məlumat verdi.

Qurum rəsmisi xokkeyçilərimizin oyunların II divizionunda İtaliya yığmasına 1:0, Qibraltar idmançılarına 7:1 hesabı ilə qalib gəldiyini, İsveç yığması ilə isə heç-heçə oynadığını, yalnız finalda Misir yığmasına məğlub olaraq, gümüş medal qazandığını bildirdi:  “Yığmamız medalın bir addımlığında olsa da, sonda “qızıl” şansını əldən verdi. Komandamızın  son final yarışında böyük əzmlə mübarizə apardığını xüsusi qeyd etmək istərdim. Ona görə də, biz idmançılarımızın “gümüş”ünü qızıl medal kimi qəbul edirik". Şahin Əliyev qış idman növləri üzrə yarışlara hazırlıqla bağlı bir sıra problemlərin olduğunu bildirdi, bunların əlaqədar qurumların və məşqçi heyətinin köməyi ilə aradan qaldırıldığını qeyd etdi.   

Tədbirdə 2013-cü ildə keçiriləcək respublika və beynəlxalq yarışlar barədə məlumat verildi. Sonda Xüsusi Qış Olimpiya Oyunlarında iştirak etmiş idmançılar Xüsusi Olimpiya Komitəsi tərəfindən mükafatlandırıldı.

Leyla QURBANOVA,
“Xalq qəzeti”