Bu günlər Bakı İdman Sarayında keçirilən futzal üzrə ənənəvi beynəlxalq turnirin mükafatları uğrunda beş ölkənin altı komandası mübarizə aparır. Sayca altıncı dəfə təşkil olunan bu yarışda iki heyətlə çıxış edən azərbaycanlı futzal ustalarının qonaqları Özbəkistan, Latviya, Belarus və Moldova yığmalarıdır.

Rəqiblər iki qrupa bölünmüşlər. Qruplardan birinə Azərbaycan, Latviya və Moldova, digərinə isə Azərbaycan-2, Özbəkistan və Belarus kollektivləri daxildirlər. Turnirin birinci günü iki oyun keçirilmişdir. Bu görüşlərdə Azərbaycanın birinci komandası latışlara böyük hesabla qalib gəlmiş-6:1, ikinci heyətimiz isə gərgin oyunda Özbəkistan futzalçılarını məğlubiyyətə uğratmışdır-2:1.

Beynəlxalq turnir dünən axşam Belarus-Azərbaycan-2 və Latviya-Moldova matçları ilə davam etdirilmişdir. Bu gün isə idman həvəskarlarımız Belarus-Özbəkistan və Moldova-Azərbaycan görüşlərinin şahidi olacaqlar.

Oqtay BAYRAMOV,
“Xalq qəzeti”