Ölkəmizin sərbəst üsulla güləşənləri Ankarada keçirilmiş Yaşar Doğunun xatirəsinə həsr edilən beynəlxalq turnirdə uğurla çıxış etmişlər. Təmsilçilərimizdən beş nəfəri fəxri kürsüdə təbrikləri qəbul etmişdir.

Komandamızda ən böyük müvəffəqiyyətə 74 kq çəki dərəcəsində yarışan Aleksandr Qostiyev nail olmuşdur. O, bütün rəqiblərinə qalib gələrək turnirin qızıl medalına sevinmişdir.

Pekin və London olimpiadalarının bürünc mükafatçısı Xetaq Qazyumov (96 kq) yalnız finalda uduzub ikinci yeri tutmuşdur. Üç güləşçimiz Yaşar  Əliyev (55 kq), Hacı Əliyev (60 kq) və Cəmaləddin Məmmədov (120 kq) evə bürünc medallarla qayıtmışlar.

Komanda hesabında Azərbaycan kollektivi Türkiyə yığmasından sonra ikinci olmuşdur. Üçüncü yeri Gürcüstan güləşçiləri tutmuşlar.

Oqtay BAYRAMOV,
“Xalq qəzeti”