Mayın 7-dən 18-dək Norveçin Stavanger şəhərində keçiriləcək superturnirin on məşhur iştirakçısı arasında Azərbaycan şahmatının lideri Teymur Rəcəbov (2793) da olacaq.

Yarışın saytında bu turnir barədə verilən məlumatda həmçinin bildirilir ki, onun mükafatları uğrunda Rəcəbovla yanaşı Maqnus Karlsen (Norveç, 2872), Vladimir Kramnik (Rusiya, 2810), Levon Aronyan (Ermənistan, 2809), Sergey Karyakin (Rusiya, 2786), Vişvanatan Anand (Hindistan, 2780), Veselin Topalov (Bolqarıstan, 2771), Hikaru Nakamura (ABŞ, 2767), Van Hao (Çin, 2743) və Con Ludviq Hammer (Norveç, 2629) mübarizə aparacaqlar.

İlk dəfə keçirilib orta reytinqinə görə (2776) şahmat tarixində ən güclü turnirə çeviriləcək bu yarışın çox mötəbər olacağına belə bir fakt da sübutdur ki, rəqiblərdən dördü bu gün dünya reytinq cədvəlinin ən yüksək pillələrində irəliləyən Karlsen, Kramnik, Aronyan və Rəcəbovdur. Elə qarşıdakı turnirin qalan iştirakçıları, xüsusən də hazırkı dünya çempionu Anand və keçmiş çempion Topalov da şahmat aləmində çox məşhur simalardır. Bu səbəbdən də Stavanger superturnirinə neçə böyük maraq göstəriləcəyini elə indidən təsəvvür etmək olar.

Lakin Rəcəbov Karlsenin vətəni Norveçə səfərə çıxmazdan əvvəl Londonun qonağı olacaq. İngiltərə paytaxtında iddiaçıların dünya birinciliyi uğrunda turniri gündən-günə yaxınlaşır. Martın 15-dən aprelin 1-dək keçiriləcək bu yarışda Rəcəbov, Karlsen, Kramnik, Aronyan, habelə Aleksandr Qrişuk, Pyotr Svidler (hər ikisi Rusiya), Boris Gelfand (İsrail) və Vasili İvançuk (Ukrayna) çıxış edəcəklər. Turnirin yekununda səkkiz qrossmeysterdən ən güclüsü dünya çempionu Anand ilə tac uğrunda matçda qarşılaşmaq hüququ qazanacaq.

Oqtay BAYRAMOV,
“Xalq qəzeti”