Azərbaycan paytaxtının “Azərreyl” və “Rabitə” klublarının qadın voleybol komandaları arasında Çempionlar Liqası turnirinin ikinci pley-off mərhələsində bu addımı da ata bilib-bilməyəcəklərini qarşıdakı həftələrdə biləcəyik. Hələlik isə hər iki kollektivimiz İstanbulda keçiriləcək “Dördlər finalı”nın iştirakçısı olmaq məqsədinə çox yaxındır.

Bakı klublarının Liqanın ikinci pley-off mərhələsində (onu 1/3 final da adlandırırlar) qarşılaşacaqları rəqiblər çoxdan məlum idisə, bu günlər oyunların keçiriləcəyi tarix də dəqiqləşmişdir. “Azərreyl”in rəqib meydanında “ Yamamay” (İtaliya) ilə ilk oyunu fevralın 5-nə təyin edilmişdir. “Rabitə” də ikinci pley-off mərhələsinin ilk görüşünü səfərdə keçirəcəkdir. Voleybolçularımız fevralın 6-da Kazanda (Rusiya) yerli “Dinamo”nun qonağı olacaqlar. Paytaxtımızda cavab matçlarını bu oyunlardan bir həftə sonra izləmək imkanı qazanacağıq.

Deməli, bu cütlərdə “Dördlər finalı”nın iştirakçıları qəti olaraq Bakıda müəyyənləşəcək. “Yamamay” və “Dinamo” nə qədər iddialı rəqiblər olsalar da, “Azərreyl” və “Rabitə” onlarla çətin rəqabətdə hər şeyi öz xeyirlərinə həll edə bilərlər.

Bu arada Azərbaycan Superliqasında növbəti, 12-ci turun oyunları keçirilmişdir. Turun mərkəzi görüşündə “Rabitə” volebolçuları “Azərreyl” üzərində 3:0 hesabı ilə inamlı qələbə qazanmışlar. “İqtisadçı” gərgin oyunda “Lokomotiv”i məğlubiyyətə uğradaraq (3:2) özünün lider mövqeyini qorumuşdur. “Telekom” - “Lokomotiv - Biləcəri” görüşündə isə 3:0 hesabı qeydə alınmışdır.

Hazırda turnir cədvəlinə başçılıq edən “İqtisadçı”nın 25 xalı vardır. Onun ən yaxın izləyicisi “Rabitə” də bir o qədər xala malikdir. Lakin hissələrin daha yaxşı fərqinə görə tələbələrin komandası irəlidədir. Hər iki lider on oyun keçirmişdir. Üçüncü yeri tutan “Azərreyl” səkkiz görüşdə 21 xal toplamışdır.

 “Xalq qəzeti”