Ölkəmizin şahmat məktəbinin iki yetirməsi Azər Mirzəyev (2547) və Bəhruz Rzayev (2370) bu günlər İspaniyanın Seviliya şəhərinin qonağıdırlar. Onlar həmin şəhərdə beynəlxalq turnirdə çıxışlarına başlamışlar.

Sayca 38-ci dəfə keçirilən bu ənənəvi yarışda həmvətənlərimiz və ispanlarla yanaşı, İngiltərə,  Almaniya, Argentina, Xorvatiya, Kuba, Hindistan, İtaliya, Portuqaliya, Danimarka və digər ölkələrin 170-dən çox təmsilçisi mübarizə aparır. Retinqə görə iştirakçıların siyahısına Mirzəyev başçılıq edir. Rzayev isə siyahıda 27-cidir.

Doqquz turdan ibarət turnirdə ilk görüşlər dünən oynanılmışdır. Qalib və mükafatçıların müəyyənləşəcəyi sonuncu tur yanvarın 19-na təyin edilmişdir. 

Onu da diqqətinizə çatdıraq ki, bu günlərdə 16 yaşlı şahmatçılardan ibarət komandalar arasında növbəti Ümumdünya Olimpiyadasının keçiriləcəyi ölkə də məlum olmuşdur. FİDE.com saytının yaydığı xəbərə görə, bu yarış iyulun üçüncü ongünlüyündə Çin Xalq Respublikasının Çuntszın şəhərində təşkil ediləcək. Olimpiyadada hər komanda dörd əsas və bir ehtiyat oyunçudan ibarət olacaq. Turnir İsveçrə sistemi üzrə keçiriləcək və onun iştirakçıları on turda mübarizə aparacaqlar.

 “Xalq qəzeti”