Qadın voleybol komandaları arasında Azərbaycan Superliqasında 10-cu turun oyunları turnir cədvəlinə başçılıq edən klublara növbəti qələbə sevinci gətirmişdir. Başlıcası isə çempionatın üç dəst medalına əsas namizədlər bu görüşlərdə elə bir problemlə üzləşmədən hərəyə 3 xal qazanmışlar.

“İqtisadçı” voleybolçuları “Telekom” u, “Azərreyl” də “Lokomotiv-Biləcəri”ni üç hissədə məğlubiyyətə uğratmışlar. “Rabitə” -“Bakı — Azəryol” matçında isə 3:1 hesabı qeydə alınmışdır.

Hazırda cədvəlin ilk iki pilləsində qərar tutmuş “İqtisadçı” və “Rabitə”nin səkkiz görüşdən sonra hərəyə 21 xalı vardır. Onlardan bir oyun az keçirən “Azəreyl” 18 xal toplamışdır.

Elə buradaca xatırladaq ki, Çempionlar Liqasında mübarizəni davam etdirən komandalarımız gələn həftə Avropa klub voleybolunun bu ən nüfuzlu yarışının pley-off mərhələsində ilk görüşlərini keçirəcəklər. “Azərreyl” və paytaxtımızın digər təmsilçisi “Lokomotiv” öz aralarında “münasibətləri aydınlaşdıracaqlar”, “Rabitə” isə Fransada yerli “Kann” komandasının qonağı olacaq. Hər iki oyun yanvarın 16-na təyin edilmişdir.

 “Xalq qəzeti”