Beynəlxalq Şahmat Federasiyasının (FİDE) 2013-cü il yanvarın 1-nə olan vəziyyətə görə dərc etdirdiyi reytinq cədvəlinin ilk on pilləsində yer almış qrossmeysterlər səkkiz ölkənin nümayəndələridir. Bu siyahıda təkcə Azərbaycan və Rusiya hərəyə iki şahmatçı ilə təmsil olunur.

Həmvətənlərimiz Teymur Rəcəbov (2793) cədvəldə dördüncü, Şəhriyar Məmmədyarov (2766) onuncu mövqedədirdər. Rusiyalılar Vladimir Kramnik (2810) və Segey Karyakin (2780) müvafiq surətdə ikinci və altıncı pillələrdə irəliləyirlər.

Norveçli Maqnus Karlsenin (2861) başçılıq etdiyi siyahıya həmçinin Levon Aronyan (Ermənistan, 2802), Fabiano Karuana (İtaliya, 2781), Vişvanatan Anand (Hindistan, 2772), Veselin Topalov (Bolqarıstan, 2771) və Hikaru Nakamura (ABŞ, 2769) daxildirlər.

Bu arada ilin ən mötəbər şahmat hadisəsi olan iddiaçıların matçlarına bir qədər də yaxınlaşmışıq. Səkkiz qrossmeysterin, o cümlədən Rəcəbovun iştirakı ilə keçiriləcək bu matçlara martın 14-də Londonda start veriləcək. Üç həftəyə qədər davam edib aprelin 1-də finişə çatacaq iddiaçıların matçları Azərbaycanın idman ictimayyiyətinin diqqət mərkəzində olacaq. Axı, turnirin qalibi hazırkı dünya çempionu Anand ilə şahmat tacı uğrunda mübarizə aparmaq hüququ qazanacaq. Qrossmeysterimizin gərgin hazırlığı da məhz bu məqsədə yönəlmişdir.

“Xalq qəzeti”